AQŞ Ükimeti azamattarına Amerikağa kiruge tıyım salınğan elderdiñ qatarın Soltüstik Koreya, Venesuela jäne Çad memleketterimen tolıqtırdı. Aq üy bwl şeşimdi atalğan memleket ükimetteriniñ mälimdemelerine qarap, qabıldağanın tüsindirdi. Bwl turalı VVS aqparattıq agenttigi jazdı. 

Donal'd Tramp öziniñ tvitter paraqşasında: "Amerikanıñ qauipsizdigin qamtamasız etu - meniñ nömiri birinşi qızmetim. Biz özimiz senim arta almaytın eldiñ azamattarın qabılday almaymız", -dep jazdı.

Osı twsta Venesuelağa qarsı qoldanısqa engizilgen şekteuler tek bilik ökilderi men olardıñ otbasılarına qatıstı ekenin eskertip ötken jön. Osığan deyin Donal'd Tramptıñ qıtığına tigen elderdiñ qatarında Iran, Süriya, Liviya, Yemen men Somali bolğan. Soñğı şeşim boyınşa osı elderdiñ tizimin tolıqtırıp twrğan Sudanğa salınğan tıyım alınıp tastaldı. Donal'd Tramptıñ altı birdey mwsılman memleketin qamtitın tizimi köp talasqa tüsip, talqı tudırğan şeşim boldı äri "mwsılmandarğa salınğan tıyım" degen atau aldı.

Amerika üşin "senimsiz" dep tabılğan üş memlekettiñ azamattarınıñ AQŞ-qa saparın şekteudiñ negizdemeleri tömende berilgen:

Soltüstik Koreya - Amerikamen eşqanday sayasi, diplomatiyalıq, ekonomikalıq baylanısı joq memleket sanaladı. Soñğı şielenisken qarım-qatınastar men soğıs qaupi turalı boljamdar kezinde, AQŞ-tıñ KHDR-dı "wnatpau" sebebin tüsindiru artıq şığar.

Çad - terrorizmge qarsı küresti qoldaytın memleket bolğanına qaramastan, AQŞ-tıñ küdik tudırğan azamattar men terrorlıq akt faktilerine qarsı paydalı aqparattar beru turalı swranısın qanağattandırmay otır.

Venesuela - bilik ökilderiniñ säuir ayınan bastap jalğasıp kele jatqan köterilister men demokratiyağa qarsı jasağan äreketterin  AQŞ qoldamaytının osılay bildiredi.

“The Qazaq Times”