Qırğızstannıñ Oş oblısında prezidenttikke ümitker Ömirbek Babanovtıñ jaqtastarına qısım körsetilude – dep habarlaydı centre1.com aqparat közi.

Aqparat köziniñ mälimetinşe, Oş oblısındağı Ömirbek Babanovtıñ jaqtastarına jergilikti qwqıq qorğau organdarı men qılmıs äleminiñ ökilderi qısım körsetude. Policiya qızmetkerleri Oş qalasındağı Babanov saylau ştabınıñ qızmetkerleriniñ atı-jönin bilip alıp, olarğa jwmıs orındarınıñ basşıları arqılı qısım körsetken. Al studentterdi «Babanovpen kezdesuge barsa oqudan şığaramız» dep qorqıtqan.

Osıdan birneşe kün bwrın Babanov Oş oblısına öziniñ «Alğa bastar jol» attı prezidenttik bağdarlamasın tanıstıruğa barğan. Ol Oş halqınıñ aldında söylegen sözinde prezident bolıp saylansa el boyınşa jalaqını eki esege köbeytetinin, jemqorlıqpen küresetinin jäne körşi memlekettermen jaqsı qarım-qatınas ornatatının aytqan.

Qazirgi tañda Ömirbek Babanov Qırğızstandağı prezident saylauında qazirgi el prezidenti Almazbek Atambaevtıñ partiyalası Sooronbay Jeenbekovtıñ bastı qarsılastarınıñ biri. Köptegen sarapşılardıñ sözinşe, Babanovtıñ 15 qazanda ötetin prezident saylauında jeñiske jetuge barlıq mümkindikteri bar. Onıñ qarjı resursı men sayasi bağdarlaması bwl jolğı saylauda özge kandidattarmen salıstırğanda joğarı twr.

Esteriñizge sala keteyik, däl osı Ömirbek Babanov Almatı qalasında Qazaqstan prezidenti Nwrswltan Nazarbaevpen kezdeskennen keyin, Qırğızstan biligi Qazaqstanğa qarsılıq notasın jibergen bolatın. Jibergen nota boyınşa resmi Bişkek Nwrswltan Nazarbaevtıñ Ömirbek Babanovpen kezdesuin «Qırğızstannıñ işki isterine aralasu» dep bağalağan. Keyinnen Qazaqstan SİM Qırğızstan biiliginiñ bwl kezdesuge osınday därejede narazılıq bildiruin tüsinbeytinin aytıp, jauap notasın jibergen bolatın.

“The Qazaq Times”