AQŞ prezidentiniñ Auğanstan sayasatı turalı şeşimi jariyalanğannan keyin, Taliban wyımı mälimdeme jasap, AQŞ armiyasın tez arada Auğanstannan şığaruın talap etti. Bwl turalı «Franc-Press»-ke silteme jasay otırıp «Pars.Aqparat» agenttiginiñ resmi saytı habarladı.

Seysenbi küni Talibannıñ bas mälimdemeşisi Zabihulla Modjahet arnaulı mälimdeme jasap, Tramptıñ Auğanstandağı äsker sanın arttıru şeşimine jauap berdi. Ol sözinde: «Eger AQŞ bwl elden äskerlerin alıp ketpese, Auğanstan amerikalıqtar üşin molağa aynaladı», – dedi. Taliban küşteri Auğanstan soğısı AQŞ äskerlerin alıp ketkennen keyin ğana şeşim tabadı dep qaraydı.

Atalğan mälimdemede jäne de: «AQŞ mwndağı soğıstı jalğastırudıñ ornına, şeginu joldarın qarastırsın. AQŞ-tıñ bir sarbazı qalsa da biz basqınşılarmen soğıstı jalğastıra beremiz», – delingen.

AQŞ prezidenti öz sözinde Auğanstandağı äsker sanın qanşağa arttıratının aşıp aytpadı. Alayda, Aq üy lauazımdılarınıñ biri Tramptıñ Pentagonğa joldağan nwsqauın negizge ala otırıp, Auğanstanğa 3900 äsker kirgizui mümkin ekenin aytqan. Şeteldiñ keybir sarapşıları bwl eldegi Amerika Qwrama Ştat armiyasınıñ beybit twrğındardıñ ölimi men infraqwrılımdardı bülinuinen basqa tabısı joq dep qaraydı.

“The Qazaq Times”