Денсаулық сақтау министрі Алексей Цой 28 шілде күнгі үкімет отырысында, 3 тамыздан бастап елде карантин шараларын біртіндеп жеңілдетуді коронавируспен күрес жөніндегі мемлекеттік комиссияға ұсынды.

Алексей Цой: «Елдегі жағдай бір апта бойы R коэффициенті 1-ден аспаса және ауруханаларда 70%-ға жуық орын бос болып, адам шығыны тұрақталса, карантин шараларын жеңілдетуге болады», – деді.

Карантин шаралары жеңілдетілген жағдайда мына нысандар жұмыс істейді:

Сауда үйлері, ойын-сауық орталықтары, жабық базарлар, балабақшалар және балаларды дайындайтын әртүрлі орталықтар. Сонымен қатар шаштараз, сұлулық салондары алдын ала жазылу арқылы қызмет көрсетуі керек. Ал қоғамдық орындарда 3-тен артық адам топтаспауы керек.

Министрдің айтуынша, соңғы үш аптада «инфекцияның таралу көрсеткіші 1,2%-дан 0,99%-ға азайған, ауруханадағы орындар 90%-дан 47%-ға дейін босаған». Бұл көрсеткіштерге қарасақ, карантин шараларын біртіндеп жеңілдетуге болады деді.

Мемлекеттік комиссия жетекшісі Асқар Мамин Денсаулық сақтау министрі Алексей Цойдың ұсынысын комиссия қарайтынын айтты.

"The Qazaq Times"