Тайуандағы Хуалиен қаласындағы жер сілкінісі салдарынан қайтыс болғандар саны 17-ге жетті, - деп хабарлайды Euronews ақпарат агенттігі.

Мыңдаған құтқару қызметкерлері 6,5 балдық жер сілкінісінен 50 градусқа қисайған 12 қабатты тұрғын үйдің қираған бөліктерін тінтіп шықты.

Бұл соңғы 50 жылда болған ең қуатты жер сілкінісі болды.

Қайтыс болғандардың үшеуі - туристер. Олардың денелері (ер адам, әйел адам және бала) 12 қабатты тұрғын үй қалдықтары астынан табылған.

Хуалиен әкімі Фу Кун Чидің (Fu Kun-chi) мәлімдеуінше, құтқарушылар ғимараттың астында қалып қойған екі адамның денесін алып шыға алмаған. Себебі оларды алып шығу үшін ғимаратты құлату керек, ал ол тағы бірнеше адамның өліміне алып келуі мүмкін. Құтқару операциясы құрбандардың туысқандары келісімімен тоқтатылды.

Қайтыс болғандардың жетеуі Қытайдан, бесеуі Тайуаннан, біреуі Филиппиннен және екеуі Канададан екен.

Бұдан бөлек, 270-тен астам адам түрлі жарақат алған.

“The Qazaq Times”